பூவினும் மெல்லிய இதயம் தாரும் இறைவா
தூய நல்பனிபோல் எண்ணம் தாரும் தலைவா
வானினும் உயர்ந்த இலக்கினை வழங்கிடு இறைவா
சிகரங்கள் தேடிடும் முயற்சிகள் ஈந்திடு தலைவா - 2

1. நினைவிலும் தீங்கு நினையா நெஞ்சம் வேண்டும்
நிற இன பேதங்கள் பேணிடா மானுடம் வேண்டும் - 2
உயிர்களைக் காத்திடும் உணர்வுள்ள மாந்தர்கள்
உண்மையின் வலிமையை உணர்த்திடும் உலகினர் - 2
எங்கினும் நிறைந்திட வேண்டும் எண்ணங்கள் புதிதாய் வேண்டும்

2. பணிவிடை புரிவதில் மகிழும் மனங்கள் வேண்டும்
பகிர்வதில் வளர்ந்திடும் செயல்நெறி ஓங்கிட வேண்டும் - 2
தாழ்ச்சியும் பணிவும் தாய்மையின் பரிவும்
சமத்துவக் கனவும் சாதிக்கும் உணர்வும் - 2
புவியில் நிலைத்திட வேண்டும் புனிதத்தில் நிறைந்திட வேண்டும்

---