என் மீட்பர் எந்தன் உள்ளம் வருகின்ற நேரமிது
என் இயேசு எந்தன் உயிர் கலந்திடும் வேளையிது
உணவாய் உணர்வாய் வா இறைவா - 2
என் உயிராய் உறவாய் வா இறைவா

1. மண்ணோடு விதையானேன் உந்தன்
உயிர் தந்தாய் நான் மரமானேன்
விண்ணோடு முகிலானேன்
உந்தன் வரம் பொழிந்தாய் நான் மழையானேன்
கடலோடு கலந்திடும் நதியாக நான்
உன்னில் கலந்திடும் புது உறவு
கனிவோடு காத்திடும் கரம் பற்றி நடந்திடும்
உன் அன்பு தரும் நிறைவு
காற்றோடு பேசும் பூவாய் உன்னோடு நானும் பேச
அமுதாகும் உந்தன் வரவு

2. விளக்கோடு திரியானேன்
சுடராக என்னில் வந்தாய் ஒளியானேன்
உன்னோடு உறவானேன் உணவாக நீ வந்தாய் நிறைவானேன்
உடலோடு கலந்திடும் உயிர்மூச்சே நீ
என்னில் உருவாக்கும் புது உணர்வு
விழியோடு இமையாக வழியெல்லாம் துணையாக
ஒன்றான புது நினைவு உலகெல்லாம் உந்தன் ஆசி
விலகாது எந்த நாளும் நிலையாகும் புதுவாழ்வு

---