ஒன்றாகக்கூடி வந்து பாடும் நேரம் - இது
நன்றியை மாலைகட்டிச் சூடும் நேரம் - 2
ஆண்டவர் படைத்த நாள் இது இன்று - 2
அன்போடு உறவாடிச் சேரும் நேரம்
கூடிவருவோம் நன்றி கூறிவருவோம் - இன்று
உள்ளத்தின் உறவுப் பூவைத் தூவி மகிழ்வோம் - 2

1. இறையன்பு இணைக்கின்ற குலமாகினோம்
பிறரன்பில் வாழுகின்ற பிறப்பாகினோம் - 2
அன்பென்னும் புதுவாழ்வின் ஆடையணிவோம் - 2
ஆனந்த பண்பாடிக் கொண்டாடுவோம் - கூடிவருவோம்

2. குரல் வேறு ஆனாலும் பா ஒன்றுதான்
உடல் வேறு ஆனாலும் மனம் ஒன்றுதான் - 2
இனம் வேறு குலம் வேறு என்பவையெல்லாம் - 2
இயேசுவுக்குள் வந்த நம்மில் இல்லை என்போம் - கூடிவருவோம்

---